Il giovane favoloso

«Il giovane favoloso» bioqrafik filmi 1798-ci ildə dünyaya gəlmiş italiyalı şair və mütəfəkkir Cakomo Leopardinin keşməkeşli həyat yolundan bəhs edir. Uşaqlıqdan zəif və utancaq olan Cakomo günlərini evdən çıxmadan keçirir. O, vaxtının böyük hissəsini atasının zəngin kitabxanasında müxtəlif dilləri və elmləri müstəqil şəkildə öyrənməyə həsr edir.

Təcrid olunmuş həyat tərzi və gərgin zehni fəaliyyət gəncin onsuz da kövrək olan səhhətini daha da pisləşdirir. Lakin zaman keçdikcə Leopardinin doğma divarları tərk etməsi qaçılmaz olur. Kitabxana sakitliyindən kənara çıxıb böyük aləmlə üzləşmək qapalı gənc üçün olduqca ağır və dözülməz bir sınağa çevrilir.

İtaliya istehsalı olan bu tarixi dramı 2014-cü ildə rejissor Mario Martone ərsəyə gətirib. Ekran əsərində baş rolu Elio Jermano canlandırır, digər əsas obrazlarda isə Mikele Riondino, Massimo Popolitsio və Anna Muqlalis çəkiliblər.