Böyük arka

1983-cü ildə Fransa prezidenti Fransua Mitteran Parisin Defans rayonunda möhtəşəm bir abidənin inşası üçün beynəlxalq müsabiqə elan edir. Yeni layihə Luvr və Zəfər tağı ilə eyni xətt üzərində yerləşməlidir. Fransa ictimaiyyətinə tamamilə naməlum olan danimarkalı memar Yohan Otto fon Sprekkelsen gözlənilmədən bu nüfuzlu yarışın qalibi seçilir.

Əlli üç yaşlı sənətkar nəhəng tikintiyə şəxsən rəhbərlik etmək məqsədilə dərhal Parisə gəlir. O, xəyalındakı Böyük arkanı kağızdakı kimi dəqiq qurmağa çalışır. Lakin memarın sarsılmaz prinsipləri tezliklə mürəkkəb mühəndislik məhdudiyyətləri və siyasi təzyiqlərlə toqquşur.

«Böyük arka» (L'inconnu de la Grande Arche) bioqrafik tarixi dramı Fransa və Danimarka tərəfindən 2025-ci ildə birgə ərsəyə gətirilib. Filmin rejissoru Stefan Demustyedir, baş rolları isə Klas Banq, Sidse Babett Knudsen, Ksavye Dolan və Svann Arlo canlandırıblar.