Bethovenin köçürülməsi

Vyana konservatoriyasının tələbəsi Anna Holts məşhur bəstəkar Lüdviq van Bethovenin yanında köməkçi kimi işləməyə başlayır. Gənc qıza dahi musiqiçinin Doqquzuncu simfoniya üzərindəki qeydlərini və əlyazmalarını səliqə ilə not vərəqlərinə köçürmək həvalə olunur.

Bəstəkarın mürəkkəb xarakteri və musiqi dünyası ilə yaxından tanış olan Anna bu prosesin pərdəarxasını görür. Dahi əsərlərin yaranması yalnız böyük ilhamla deyil, həm də müəllifin ağır ruhi sarsıntıları və iztirabları ilə müşayiət olunur.

2006-cı ildə ekranlara çıxan «Copying Beethoven» bioqrafik dram filmi Böyük Britaniya, Almaniya və Macarıstanın birgə istehsalıdır. Ekran əsərinin rejissoru Aqneşka Hollanddır, baş rolları isə Ed Harris, Dayan Krüqer, Metyu Qud və Ralf Rayç canlandırıblar.