Vəhşi Liqa

XX əsrin əvvəllərində sadə kəndli Varlam sevdiyi qadınla bir yerdə olmaq xatirinə Volqa sahillərini tərk edib Moskvaya köçməli olur. Qəsəbədəki yumruq döyüşlərində gücünü nümayiş etdirən gənc yerli futbol klubunun sahibi olan ingilis sahibkarın diqqətini çəkir. Əcnəbi rəhbər onu öz komandasına dəvət etsə də, zəngin ailələrdən olan oyunçular bu kobud kəndli oğlanı aralarına qəbul etmək istəmirlər.

Özünə qarşı bu cür münasibətlə barışmayan Varlam futbola ürəkdən bağlanan tacir Balaşov ilə tanış olur. Onlar birlikdə sadə zəhmətkeşlərdən ibarət ilk xalq komandasını yaradırlar və gənc idmançı bu heyətin kapitanına çevrilir. Bu yeni komandanın meydana çıxması yerli sakinlərin futbola olan baxışını kökündən dəyişir və idmanı kütləvi oyuna çevirir.

«Vəhşi Liqa» bioqrafik idman dramı rejissorlar Andrey Boqatıryov və Art Kamaço tərəfindən 2019-cu ildə lentə alınıb. Rusiyada çəkilən filmin baş rollarını Vladimir Yaqlıç, Adelina Qizatullina, İvan Oxlobıstin və Dmitri Nazarov canlandırır.