Qardaşların dueli: Adidas və Puma-nın tarixi

Ötən əsrin 20-ci illərində Adolf və Rudolf Dassler qardaşları Bavariyanın Hertsoqenaurax şəhərində kiçik ayaqqabı fabriki açırlar. Adinin sənətkarlıq istedadı və Rudinin kommersiya bacarığı sayəsində ailə biznesi sürətlə inkişaf edir. Dünyanın ən məşhur idmançıları yarışlarda məhz onların hazırladığı idman ayaqqabılarına üstünlük verirlər.

İkinci Dünya müharibəsinin başlaması ilə istehsalat demək olar ki, tamamilə dayanır və bu dövrdə qardaşlar arasındakı münasibətlər pisləşir. 1948-ci ildə birgə müəssisə birdəfəlik bölünür və tərəflər bir-birinə barışmaz rəqibə çevrilirlər. Nəticədə eyni şəhərdə iki nəhəng şirkət — Adidas və Puma fəaliyyətə başlayır.

Almaniya istehsalı olan bu tarixi dram filmini rejissor Oliver Dommenqet 2016-cı ildə lentə alıb. Əsas rolları Ken Duken, Torben Libreqt, Cessi Albert və Florian Bartolomay canlandırıblar.