Tanrının yaratdığı

Ötən əsrin qırxıncı illərində cərrah Alfred Blelok Baltimor xəstəxanasında tibb aləmini dəyişdirəcək addım atır. O, anadangəlmə ürək qüsurundan əziyyət çəkən uşaqların xilası üçün tamamilə yeni əməliyyat üsulları üzərində çalışmağa başlayır. Həmin axtarışlarda qaradərili laborant Vivyen Tomas onun ən yaxın köməkçisinə və sirdaşına çevrilir.

İki mütəxəssisin birgə əməyi dövrün qəbul olunmuş qaydalarına zidd gəlir və ictimaiyyət tərəfindən birmənalı qarşılanmır. Cəmiyyətdəki ayrı-seçkilik Alfred ilə Vivyenin həm elmi fəaliyyətini, həm də illər boyu formalaşan dostluq bağlarını sınağa çəkir.

«Tanrının yaratdığı» bioqrafik dram filmi rejissor Cozef Sargent tərəfindən 2004-cü ildə ABŞ-da lentə alınıb. Baş qəhrəmanların taleyini ekranlarda aktyorlar Alan Rikman və Yasin Bey canlandırıblar.