Masamın arxasındakı mələk

Qırmızı saçları və utancaq xarakteri ilə seçilən Janet Yeni Zelandiyada çoxuşaqlı bir ailədə böyüyür. Hələ məktəb vaxtlarından şeir yazmağa başlayan qız kollec illərində ilk hekayələrini çap etdirir. Lakin dərin depressiya və əsəb sarsıntıları onun psixiatriya xəstəxanasına düşməsinə səbəb olur. Həkimlər gənc qıza səhvən şizofreniya diaqnozu qoyur və onu səkkiz il boyunca elektroşok da daxil olmaqla ağır müalicələrə məruz qoyurlar.

Bütün bu sınaqlara baxmayaraq, Janet yazmağa davam edir və ilk hekayələr toplusu ilə böyük ədəbi mükafat qazanır. Əldə etdiyi bu uğur sayəsində o, planlaşdırılan lobotomiya əməliyyatından xilas olaraq xəstəxananı tərk edir. Tanınmış yerli yazıçının dəstəyini qazanan və yeni kitabından sonra ədəbi qrant alan Janet fərqli duyğular və yeni nailiyyətlər arxasınca Avropaya yola düşür.

«Masamın arxasındakı mələk» bioqrafik dram filmi rejissor Ceyn Kempion tərəfindən lentə alınıb. 1990-cı il istehsalı olan bu ekran əsəri ABŞ, Böyük Britaniya, Yeni Zelandiya və Avstraliyanın birgə layihəsidir. Filmin əsas rollarını Kerri Foks, Aleksiya Keoq, Karen Ferqyuson və İris Çörn canlandırır.