Saxtapul kəsən

1950-ci illərdə Fransaya mühacirət edən polyak mühəndis Yan Boyarski rəsmi qurumların yaratdığı maneələrlə üzləşir. Dövlət sistemi onun saysız-hesabsız kəşflərinə patent verməkdən imtina edir və istedadlı ixtiraçını peşəsi üzrə qazanc əldə etmək imkanından məhrum qoyur. Çıxış yolu axtaran mühəndis biliklərini fərqli istiqamətə yönəldərək saxta pul əskinasları hazırlamağa başlayır.

Onun istehsal etdiyi pullar o qədər qüsursuz alınır ki, Fransa Bankı bu naməlum ustaya görə böyük mükafat təyin edir. Yan ailəsindən xəbərsiz ikili həyat sürərkən, təcrübəli polis müfəttişi Matte yalnız saxta əskinasların dəst-xətindən tanıdığı bu sirli cinayətkarın izinə düşür.

2025-ci ildə çəkilmiş Fransa istehsalı olan «L'affaire Bojarski» bioqrafik dramının rejissoru Jan-Pol Salomedir. Ekran əsərində baş rolları Reda Kateb, Sara Jirodo, Bastyen Buyon və Pyer Lotten canlandırıblar.