İctimai Düşmənlər

1930-cu illərin Amerikasında cəsarətli bank qarətçisi Con Dillincer sadə insanların gözündə bir növ qəhrəmana çevrilir. Həbsxanalardan qaçmağı bacaran bu qanunsuz dəstəyə Körpə Nelson və Elvin Karpis kimi digər təhlükəli cinayətkarlar da qoşulur. Yerli orqanlar isə onların həyata keçirdiyi basqınların qarşısını almaqda aciz qalır.

Bu vəziyyətdən Təhqiqat Bürosunun rəhbəri Con Edqar Huver öz xeyrinə istifadə etmək qərarına gəlir. O, Dillinceri əsas hədəf elan edərək qurumu gücləndirməyi və ölkənin baş təhlükəsizlik təşkilatı olan FTB-yə çevirməyi planlaşdırır. Qaçaq qruplaşmanın izlənməsi və zərərsizləşdirilməsi işi isə agent Melvin Pervisə tapşırılır.

ABŞ və Yaponiya istehsalı olan «Public Enemies» bioqrafik cinayət filmini rejissor Maykl Mann çəkib. 2009-cu ildə nümayiş olunan tarixi dram janrındakı layihənin əsas rollarında Conni Depp, Kristian Beyl, Marion Kotiyar və Stiven Lenq çəkiliblər.