Paula

«Paula» bioqrafik filmi XIX və XX əsrlərin qovşağında yaşamış rəssam Paula Moderson-Bekkerin həyat yolundan bəhs edir. Siyasi bəyanatlar səsləndirməyən və ictimai təşkilatlarda yer almayan bu qadın bütün ömrü boyu öz müstəqilliyi uğrunda mübarizə aparıb. O, öz həyat tərzi və əməlləri ilə digər qadınlar üçün mühüm bir nümunəyə çevrilib.

Ekran əsəri alman ekspressionizminin parlaq simalarından birinin şəxsi və sənət axtarışlarını göstərir. Şəxsiyyətinin gücünə və qətiyyətinə görə Moderson-Bekker dünya tarixində iz qoymuş Sofya Kovalevskaya, Mariya Küri və Koko Şanel kimi simalarla eyni cərgədə dayanır. Paula cəmiyyətin qoyduğu qəliblərə baxmayaraq, rənglərlə öz həqiqətini ifadə etməyi seçir.

Tarixi dram 2016-cı ildə Almaniya və Fransanın birgə istehsalı ilə rejissor Kristian Şvoxov tərəfindən çəkilib. Baş rolu Karla Yuri canlandırıb, filmin aktyor heyətində həmçinin Albrext Şux, Roksana Düran və Yoel Basman yer alıb.