Kristofer və onun kimilər

1931-ci ildə gənc yazıçı Kristofer İşervud şair dostu Uisten Hyu Odenin dəvəti ilə Berlinə yollanır. Şəhərdə qalmaq üçün ingilis dili dərsləri verən qələm sahibi yaşlı Cerald Hamilton və yerli kabaredə oxuyan aktrisa Cin Ross ilə eyni mənzildə məskunlaşır. Ətrafındakı maraqlı insanlar və qarşılaşdığı müxtəlif simalar onun gələcək hekayələrinin əsas personajlarına çevrilir.

Kasparla olan qısamüddətli tanışlıqdan sonra Kristofer təmizlikçi işləyən Hayntsla rastlaşır və ona aşiq olur. O, sevgilisinin anasının müalicə xərclərini ödəyir, bu addım isə Hayntsın nasist qardaşı Herhardın qəzəbinə səbəb olur. Faşizmin güclənməsi ilə birlikdə cütlük Londona köçür, lakin vizanın bitməsi səbəbindən gənc alman geri qayıtmalı olur və onlar ayrılırlar. İllər ötür və artıq şöhrət qazanmış İşervud ailə qurub uşaq sahibi olan Hayntsla son dəfə görüşmək üçün Berlinə qayıdır.

Böyük Britaniya istehsalı olan «Kristofer və onun kimilər» bioqrafik filmi 2011-ci ildə rejissor Ceffri Saks tərəfindən çəkilib. Əsas rolları Mett Smit, Tobi Cons, Pip Karter və Duqlas But canlandırıblar.