Sakit gecə

1944-cü ilin qışında, İkinci Dünya müharibəsinin son aylarında Elizabet adlı qadın oğlu Frits ilə birlikdə Arden meşələrindəki köhnə ailə evində sığınacaq tapır. O, cəbhə xəttindən uzaqda Milad ərəfəsini dinc şəkildə qarşılamaq istəyir. Lakin bu sakitlik qapıda yaralı və silahlı üç amerikalı əsgərin görünməsi ilə pozulur.

Ev sahibi qonaqları içəri buraxmaq üçün tək şərt irəli sürür: silahlar çöldə, qarın içində qalmalı və ev bitərəf ərazi elan edilməlidir. Tərəflər arasında etimad yaranmağa başladığı anda kottecə daha üç nəfər, bu dəfə alman əsgərləri yaxınlaşır. Elizabet ailəsini qorumaq və qan tökülməsinin qarşısını almaq üçün düşmən qrupları barışdırmağa çalışır.

«Sakit gecə» bioqrafik hərbi dram janrında 2002-ci ildə Kanadada çəkilib. Ekran əsərinin rejissoru Rodni Gibbonsdur, əsas rolları isə Linda Hamilton, Metyu Harbor, Romano Orzari və Alen Qolem canlandırıb.