Sibil

Uşaqlıqda məruz qaldığı ağır rəftar və davamlı zorakılıq Sibil adlı gənc qadının psixikasında dərin izlər qoyur. Dözülməz təzyiq nəticəsində onun şüuru parçalanır. Daxili aləmi müxtəlif xarakterlərin toqquşduğu bir məkana çevrilir və çətin anlarda bədənin idarəsi başqa bir kimliyə keçir.

Zaman keçdikcə bu alternativ şəxsiyyətlərin sayı çoxalaraq on altıya çatır. Onların hər biri qadını xarici təhlükələrdən qorumaq və mürəkkəb vəziyyətləri daha asan adlamaq üçün təhtəlşüur tərəfindən yaradılır. Yetkin yaşa çatan Sibil şəraitdən asılı olaraq bir-birini əvəzləyən bu daxili qoruyucularla birgə yaşamaq məcburiyyətində qalır.

ABŞ istehsalı olan «Sibil» bioqrafik dram filmi 1976-cı ildə ekranlara çıxıb. Ekran əsərinin rejissoru Deniel Pitridir, əsas rolları isə Salli Fild, Coann Vudvord, Bred Devis və Martin Bartlet canlandırıb.