Azadlıq

Uşaqlıq çağında Auşvits-Birkenau konsentrasiya düşərgəsinin dəhşətlərini yaşamış Herbert Heller oradan qaçmağı bacarmışdı. Yaşadıqlarını altmış ildən çox bir müddətdə ən yaxın insanlarından belə gizli saxlayan Herbert heç kimə içini aça bilmirdi. Sağalmaz bir xəstəliyə tutulduğunu öyrəndikdən sonra isə o, keçmişini ən azı bir nəfərlə bölüşmək qərarına gəlir.

Herbertin seçimi gənc yaşlarında artıq ağır itki və sarsıntılarla üzləşmiş Ebbi adlı yeniyetmə qız olur. Onlar öz aralarında xüsusi bir razılaşma qururlar: Ebbi qəlbindəki yaralardan bəhs edəcək, Herbert isə əvəzində düşərgə illərinin gizli qalmış xatirələrini ona danışacaq. Bu səmimi söhbət hər iki tərəf üçün daxili rahatlıq axtarışına çevrilir.

«Azadlıq» (Liberation) tarixi dram filmi 2023-cü ildə rejissor Finn Teylor tərəfindən ABŞ-da lentə alınıb. Bioqrafik ekran əsərinin əsas rollarını Stiven Lenq, Elsi Fişer, Lyuk Devid Blumm və Robin Vayqert ifa edirlər.