Fırıldaqçılar

1980-ci illərin əvvəllərində gənc şotlandiyalı Deyvi musiqi sənayesində özünə yer tapmaq qərarına gəlir. Konsert təşkilatçılığı sahəsində heç bir təcrübəsi olmasa da, gələcəyə böyük ümidlə baxır. O, həmin dövrdə dünyanı fəth edən məşhur «Iron Maiden» rok qrupunu doğma şəhərinə gətirib böyük çıxış təşkil etmək istəyir.

Belə iddialı bir layihəni həyata keçirmək üçün külli miqdarda vəsait tələb olunur. Pulu olmayan Deyvi çıxış yolunu yerli cinayətkarlara müraciət etməkdə tapır. Tələb olunan məbləği quldurlardan borc alan gənc, Böyük Britaniyanı fəth etmək yolunda təhlükəli vəziyyətlərlə üzləşir.

«Fırıldaqçılar» (Schemers) adlı bioqrafik komediya filmi rejissor Deyv MakLin tərəfindən 2020-ci ildə lentə alınıb. Böyük Britaniya istehsalı olan bu ekran əsərində baş rolları Conatan Stüart, Billi Mitçell, Mark Riçard Torn və Kevin Park canlandırırlar.