Qılıncoynadan

Gənc idmançı Endel Nelis vaxtilə alman ordusuna çağırıldığı üçün sovet xüsusi xidmət orqanlarından gizlənməyə məcbur qalır. O, kiçik Haapsalu şəhərciyinə pənah apararaq yerli məktəbdə uşaqlara qılıncoynatma sənətini öyrətməyə başlayır. Şagirdlər bu idman növünə böyük maraq göstərir və tezliklə uğurlar qazanırlar.

Uşaqlar Leninqradda keçiriləcək yarışa vəsiqə qazandıqda məşqçinin keçmişi yenidən onun qarşısına çıxır. Endel ciddi bir seçim etməlidir: ya yetirmələri ilə birlikdə turnirə gedib həbs riskini gözə almalı, ya da öz həyatını qorumaq üçün qaçmalıdır.

Rejissor Klaus Həryö tərəfindən çəkilən «Miekkailija» bioqrafik filmi 2015-ci ildə nümayiş olunub. Finlandiya, Estoniya və Almaniya istehsalı olan bu tarixi dramda əsas rolları Ursula Ratasepp, Maria Klyonskaya, Kirill Kyaro və Alina Karmazina canlandırıb.