Changeling

Ötən əsrin iyirminci illərində Los-Ancelesdə bir ananın uşağı itkin düşür. Çarəsiz qalan qadın dərhal polisə müraciət edərək yardım istəyir. Qısa müddət sonra asayiş keşikçiləri sevindirici xəbər verərək uşağı tapdıqlarını bildirirlər və onu anasına təhvil verirlər. Lakin ana qarşısındakı uşağın xarici oxşarlığına baxmayaraq, öz övladı olmadığını dərhal anlayır.

Həqiqəti sübut etməyə çalışan qadın rəsmi qurumların güclü müqaviməti ilə üzləşir. Polis əməkdaşları öz səhvlərini ört-basdır etmək üçün bu faktı qəbul etmək istəmirlər. Nəticədə ona dəstək göstərmək əvəzinə, ananı ağılsız elan edib psixiatriya xəstəxanasına yerləşdirirlər.

Real hadisələrə əsaslanan «Changeling» filmi 2008-ci ildə ABŞ-da istehsal olunub. Bu bioqrafik detektivin quruluşçu rejissoru Klint İstvuddur. Ekran əsərində baş rolları Ancelina Coli, Con Malkoviç, Ceffri Donovan və Qettlin Qriffit ifa ediblər.