Veronika Qerin

1990-cı illərin ortalarında İrlandiyada katoliklərlə protestantlar arasındakı qarşıdurmalar fonunda narkoticarətə nəzarət uğrunda yerli kriminal qruplaşmaların mübarizəsi kəskinləşir. Rəsmi qurumlar və polis baş verənlərə susduğu halda, müstəqil qəzetin əməkdaşı Veronika Qerin cəmiyyətə həqiqətləri çatdırmaq qərarına gəlir. O, ailəsini və öz təhlükəsizliyini təhlükəyə ataraq gizli cinayətlərin izinə düşür.

Qəzetdə çıxan ifşaedici məqalələr narkobaronların qəzəbinə səbəb olur və müxbirə qarşı təqiblər başlayır. Hər yeni sui-qəsd cəhdindən sonra Veronikanın cəmiyyətdəki nüfuzu daha da artır. 1996-cı ildə onun muzdlu qatillər tərəfindən öldürülməsi ölkədə kütləvi etirazlara yol açır, qanunvericiliyin dəyişdirilməsinə və narkomafiya rəhbərlərinin həbsinə təkan verir.

«Veronika Qerin» (Veronica Guerin) bioqrafik dram və triller filmini rejissor Coel Şumaxer çəkib. Baş qəhrəmanı Keyt Blanşett canlandırıb, digər rollarda Kiran Haynds, Nial Toybin və Cimmi Qrili yer alıb. ABŞ, Böyük Britaniya və İrlandiyanın birgə istehsalı olan ekran əsəri 2003-cü ildə təqdim edilib.