Fırıldaqçı

Doxsanıncı illərin sonunda İspaniyada üç il əvvəl Texasda itkin düşmüş Nikolas Barkli olduğunu iddia edən bir gənc tapılır. Ailəsi xəbəri sevinclə qarşılayır və onu tərəddüdsüz qəbul edir. Yeniyetmənin fərqli göz və saç rənginə malik olması, yad ləhcə ilə danışması və qohumlarını tanıya bilməməsi belə doğmalarını şübhələndirmir.

Əslində isə bu şəxs əvvəllər onlarla başqa insanın adından istifadə etmiş təcrübəli fırıldaqçı Frederik Burdendir. Məsələni araşdırmağa başlayan FTB əməkdaşı və xüsusi xəfiyyə yalanı üzə çıxarmağa çalışır. Lakin təhqiqat dərinləşdikcə ailənin özünün də gizlətdiyi daha qaranlıq məqamlar üzə çıxır.

«Fırıldaqçı» (The Imposter) sənədli filmi rejissor Bart Leyton tərəfindən lentə alınıb. ABŞ və Böyük Britaniyanın birgə istehsalı olan bu ekran əsəri 2012-ci ildə nümayiş olunub. Layihədə Frederik Burden, Ken Eppldorn və Con Geycer kimi simalar yer alır.