Böyük Buğa

1980-ci illərin sonlarında Bombeydə yaşayan Hemant Şah yoxsul həyat tərzindən xilas olmaq qərarına gəlir. Anası və qardaşı Viren ilə birgə yaşayan bu gənc həm ailəsinin vəziyyətini düzəltmək, həm də sevdiyi qızın atasının gözünə girmək istəyir. Çıxış yolunu isə fond birjasında axtarır.

Birja subbrokeri kimi fəaliyyətə başlayan Hemant tezliklə qiymətli kağızlar ticarətinə dərindən bələd olur. O, Hindistanın bank sistemindəki boşluqları və çatışmazlıqları aşkar edərək öz xeyrinə çevirir. Bu yolla qəhrəman qısa müddət ərzində var-dövlətini ağlasığmaz sürətlə artırmağa başlayır.

2021-ci il istehsalı olan «The Big Bull» («Böyük Buğa») bioqrafik cinayət dramının rejissoru Kuki V. Qulatidir. Hindistan istehsalı olan bu ekran əsərində baş rolları Abhişek Baççan, Nikita Dutta, İleana D'Kruz və Sanciv Pandey canlandırıb.