Təxribatçının taleyi

Müharibə başlayan kimi gənc dəmiryolçu Ales Arloviç cəbhəyə könüllü yollanmaq qərarına gəlir. Yeni çağırışçıları Moqilyovdakı məntəqəyə apararkən sütun alman desantçıları ilə qarşılaşır və əsir düşür. Düşdüyü ağır vəziyyətdən çıxış yolu tapan Ales düşmən əsgərini zərərsizləşdirərək meşəyə qaçmağı bacarır.

Sığınacaq axtararkən o, yerli partizanlarla rastlaşır və onların sıralarına qoşulur. Dəstə rəhbərliyi ona köhnə stansiyaya qayıtmağı və düşmən qatarlarının hərəkəti barədə məlumat ötürməyi tapşırır. Bu ərəfədə şəhərə komendant Klyayner gəlir, keçmiş hakim Viktor Klimko isə işğalçıların tərəfinə keçərək yerli polislərə rəhbərlik etməyə başlayır. Şəhərdəki gizli müqavimət hərəkatından xəbər tutan Ales onlarla da əlaqə qurur.

2020-ci ildə ekranlara çıxan «Təxribatçının taleyi» filmi Rusiya və Belarus kinematoqrafçılarının birgə layihəsidir. Ekran əsərinin quruluşçu rejissorları Dmitri Astraxan və Artur İlinıx olub, əsas obrazları isə Aleksey Surenski, Andrey Smolyakov, Aleksandr Semçev və Vladimir Timofeyev canlandırıb.