Kaskadyor qadın

«Kaskadyor qadın» (The Sholay Girl) filmi 1975-ci ilin məşhur «Qisas və qanun» ekran əsərinin çəkiliş meydançasındakı hadisələrlə başlayır. Kaskadyor Reşma Pathan araba ilə mürəkkəb bir nömrə göstərərkən ağır xəsarət alır. Qadını təcili tibbi yardımla xəstəxanaya apararkən xatirələr onu uşaqlıq və gənclik illərinə qaytarır.

Yoxsulluq içində böyüyən bu cəsarətli qız küçələrdə akrobatik çıxışlar edərək pul qazanır. Onun çevikliyini görən kaskadyor quruluşçusu Əzim gənc qıza kinoda dublyor kimi fəaliyyət göstərməyi təklif edir. Mühafizəkar atasının qəti etirazlarına baxmayaraq, Reşma ailəsini dolandırmaq naminə bu təhlükəli peşəni seçmək məcburiyyətində qalır.

Bioqrafik döyüş dramı olan bu Hindistan filminin rejissoru Aditya Sarpotdardır. Baş rolları Bidita Baq, Çandan Roy Sanyal, Vinit Reyna və Prince Rodde canlandırıb. Ekran işi 2019-cu ildə təqdim olunub.