Aami

Yaxınlarının Aami deyə çağırdığı hind şairəsi və yazıçısı Kamala Dasın uşaqlıq dövrü Kəlkətə ilə Nəlappatdakı ata mülkündə keçir. Burada böyüyən qız ədəbiyyata böyük maraq göstərir və Krişna obrazına bağlanır. Lakin on beş yaşı tamam olanda ailəsi onu özündən iyirmi yaş böyük olan bank işçisi Madhav Dasla evləndirir.

Praqmatik həyat yoldaşı ilə ailə quran gənc qız ərinin soyuqluğu və mənəvi yaxınlığın yoxluğu ilə üz-üzə qalır. Evdə arzuladığı istiliyi tapmayan Aami xəyallarına və yazı masasına üz tutur. Beləliklə, daxili axtarışlar onu tədricən cəsarətli və açıqfikirli bir qələm sahibinə çevirir.

Hindistan istehsalı olan bioqrafik dram filmi «Aami» 2018-ci ildə nümayiş olunub. Ekran əsərinin rejissoru Kamal, baş rolların ifaçıları isə Mancu Varriyer, Murali Qopi, Tovino Tomas və Anupdur.