Azhar

Heydərabadlı Məhəmməd Əzharuddin babasının dəstəyi ilə uşaq yaşlarından kriketlə məşğul olmağa başlayır. İstedadı və zəhməti sayəsində gənc idmançı tezliklə peşəkar səviyyədə debüt edir. Meydandakı uğurlu çıxışları ona xalq sevgisi qazandırır, eyni zamanda sevdiyi xanım Naurin ilə ailə həyatı qurur.

Uğurlu oyun nümayiş etdirən kriketçiyə Hindistan milli yığmasının kapitanlığı həvalə olunur. Şöhrətin zirvəsində olduğu dövrdə isə onun karyerası gözlənilməz təhlükə ilə üzləşir. İdmançını danışılmış oyunlarda iştirak etməkdə günahlandırırlar və bu iddialar həyatında böyük sarsıntıya səbəb olur.

2016-cı ildə ekranlara çıxan «Azhar» bioqrafik idman dramının rejissoru Entoni D’Souzadır. Ekran əsərində baş rolları Emran Haşmi, Narqis Faxri, Praçi Desai və Lara Datta canlandırıblar.