Kirayəçi

Sakit bir ofis işçisi olan Trelkovski yaşayış yerini dəyişmək qərarına gəlir və köhnə bir binada mənzil kirayələyir. Binanın digər sakinləri ilk andan ona qarşı olduqca soyuq və narazı davranırlar. Çox keçmədən qapıçı qadından öyrənir ki, burada əvvəl yaşamış Simona adlı gənc qız pəncərədən atılaraq həyatına son qoyub.

Zaman keçdikcə bu faciə Trelkovskinin düşüncələrini tamamilə zəbt edir. O, keçmiş kirayəçi haqqında müxtəlif təfərrüatları araşdırmağa başlayır. Sakinlərin qəribə və aqressiv hərəkətlərini müşahidə edən qəhrəman qızın ölümündə məhz qonşuların əli olduğunu düşünməyə başlayır.

«Le locataire» («Kirayəçi») filmi 1976-cı ildə Fransada istehsal olunub. Rejissor kürsüsündə əyləşən və eyni zamanda baş rolu canlandıran Roman Polanskidir. Ekran əsərində həmçinin İzabel Adjani, Melvin Duqlas və Co Van Flit kimi aktyorlar çəkiliblər.