Axtarış

Tanınmış kino ulduzu Arman Kapurun idarə etdiyi avtomobil sahilyanı maneəni aşaraq dənizə düşür. Bu yol qəzasını araşdırmaq inspektor Şekhavata tapşırılır. Qısa müddətdə bəlli olur ki, aktyorun ofisdən evə gedən yolu qırmızı fənərlər məhəlləsindən keçməməli idi və o, hadisədən əvvəl külli miqdarda nağd pul götürüb.

Təmkinli və ayıq sürücünün boş küçədə maşını niyə idarə edə bilməməsi müstəntiqi dərindən düşündürür. Eyni zamanda inspektor on yaşlı oğlunun ölümü ilə sarsılan ailə həyatını qaydaya salmağa çalışır. Qaranlıq məqamları aydınlaşdırmaqda polisə Rozi adlı yerli fahişə kömək etməyə başlayır.

2012-ci ildə Hindistanda istehsal olunmuş «Axtarış» (Talaash) filminin rejissoru Rima Kaqtidir. Əsas obrazları Aamir Xan, Rani Mukherci, Karina Kapur və Navazuddin Siddiqui canlandırıblar.