Şaqalın günü

Fransanın gizli fəaliyyət göstərən ifrat sağçı OAS təşkilatı prezident Şarl de Qollu aradan qaldırmaq qərarına gəlir. Daxildən heç kimin bu işin öhdəsindən gələ bilməyəcəyini anlayan qruplaşma üzvləri kənardan peşəkar qatil tutmağa məcbur qalırlar. Şaqal ləqəbli bu təcrübəli killer yarım milyon dollar müqabilində dövlət başçısını öldürməyə razılıq verir.

«The Day of the Jackal» filmi hədəfə doğru addım-addım irəliləyən sui-qəsdçinin soyuqqanlı hazırlığını və onun izinə düşən xüsusi xidmət orqanlarının fəaliyyətini əks etdirir. Qatilin kimliyini gizlətmək üçün saxta sənədlərdən istifadə etməsi müstəntiqlərin işini daha da mürəkkəbləşdirir.

Böyük Britaniya və Fransanın birgə istehsalı olan bu ekran əsərini rejissor Fred Tsinneman çəkib. 1973-cü ildə nümayiş olunan layihənin baş rollarında Edvard Foks, Mikael Lonsdal, Terens Aleksandr və Mişel Okler yer alıb.