Missisipi alovlar içində

1964-cü ilin yayında ABŞ-ın cənubunda vətəndaş hüquqları uğrunda mübarizə aparan üç fəal qəfil yoxa çıxır. Hadisəni araşdırmaq üçün əraziyə FTB agentləri Anderson və Uord ezam olunur. Missisipidə onları irqi ayrı-seçkiliyin hökm sürdüyü və heç kimin danışmaq istəmədiyi ağır bir mühit qarşılayır.

İstintaq irəlilədikcə agentlər yerli polisin klan üzvləri ilə sıx əlaqədə olduğunu görürlər. Təcrübəli Anderson məqsədə çatmaq üçün sərt və qeyri-rəsmi üsullara üstünlük verir, gənc həmkarı Uord isə hər şeyi yalnız qanun çərçivəsində həll etməyə çalışır. İki fərqli baxış mürəkkəb axtarış prosesini daha da çətinləşdirir.

1988-ci ildə çəkilmiş «Missisipi alovlar içində» (Mississippi Burning) filminin rejissoru Alan Parkerdir. ABŞ istehsalı olan bu kriminal dramda əsas obrazları Cin Hekmen, Villem Defo, Frensis Makdormand və Bred Durif canlandırıblar.