Mənzil

Gənc iş adamı Maks Tokiodakı vacib görüşlərə yola düşməyə hazırlaşır, Parisdə isə onu nişanlısı gözləyir. Şəhər kafelərinin birində o, keçmiş sevgilisi Lizanı təsadüfən görür. İki il əvvəl heç bir xəbərdarlıq etmədən qəfil yoxa çıxan bu qadın hələ də onun yaddaşından silinməyib.

Qəribə telefon danışığından sonra Liza tələsik kafeni tərk edir. Maks onun arxasınca qaçsa da, çata bilmir və geri qayıtdıqda qadına məxsus pudra qabını və bir evin açarlarını tapır. Tokio səfərini və nişanlısını unudan baş qəhrəman Lizanın izinə düşmək qərarına gəlir.

1996-cı ildə çəkilmiş «L'appartement» detektiv və melodram janrlarını birləşdirən bir filmdir. Ekran əsərinin rejissoru Jil Mimunidir, baş rolları isə Vensan Kassel, Monika Belluççi, Roman Borinje və Jan-Filipp Ekoffe canlandırıb.