Şanxaylı ledi

Nyu-Yorkun Mərkəzi parkında gecə vaxtı gəzişən işsiz dənizçi Maykl O’Hara quldurların hücumuna məruz qalan Rozali Bannisteri xilas edir. Kişinin fiziki gücünə heyran qalan qadın onu ərinin şəxsi yaxtasında işləməyə çağırır. Rozalinin həyat yoldaşı isə uşaq iflici nəticəsində əlil qalmış varlı və nüfuzlu vəkildir.

Qadının cazibəsinə qapılan Maykl bu səyahətə çıxmağa razılıq verir. Səfər əsnasında vəkilin biznes şəriki Qrizbi dənizçiyə qəribə bir sövdələşmə irəli sürür: böyük sığorta pulunu götürüb yoxa çıxmaq məqsədilə öz qətlini saxtalaşdırmaq. Təklif olunan beş min dolları Rozali ilə qaçıb yeni həyata başlamaq üçün fürsət görən Maykl təhlükəli oyuna qoşulur.

«Şanxaylı ledi» filminin rejissoru və baş rol ifaçısı Orson Uellsdir. Ekran əsərində mərkəzi qadın obrazını Rita Heyvort canlandırıb, digər rollarda isə Everet Sloun və Qlenn Anders çəkiliblər. ABŞ istehsalı olan bu cinayət dramı 1947-ci ildə nümayiş olunub.