Ulduzlarda yox olan

Evlilik ildönümünü qeyd etmək üçün Tailand adasına yollanan He Feyin həyat yoldaşı qəfil yoxa çıxır. İki həftə davam edən axtarışlar heç bir nəticə vermir, lakin gözlənilmədən bir qadın ortaya çıxır. Həmin şəxs He Feyin əsl arvadı olduğunu və sadəcə küsərək qonşu adaya getdiyini iddia etsə də, kişi qarşısındakının tamam başqa adam olduğunu bildirir.

Polis He Feyin sözlərinə inanmır, çünki qadının bütün sənədləri qaydasındadır və şahidlər də onun dediklərini təsdiqləyir. Keçmiş dalğıc olan baş qəhrəmanın qəbul etdiyi güclü nevroloji dərmanlar hüquq-mühafizə orqanlarının şübhəsini daha da artırır. Viza müddətinin bitməsinə az qalmış vəziyyətdən çıxış yolu axtaran kişi heç vaxt məğlub olmayan məşhur vəkilə üz tutur.

2022-ci ildə nümayiş olunan Çin istehsalı olan «Xiao shi de ta» triller və detektiv janrındadır. Filmin rejissorluğunu Tsuy Juy və Lyu Syan həyata keçirib. Əsas rollarda Çju Yilun, Ni Ni, Cenis Man və Du Tszyan çəkiliblər.