Trans

Hərrac evinin əməkdaşı Saymon təhlükə anında qiymətli rəsmləri seyfdə gizlətməyə cavabdehdir. Soyğun zamanı başından ağır zərbə alan gənc xəstəxanada ayılır və heç nə xatırlamır. İncəsənət əsəri isə yoxa çıxıb: nə seyfdədir, nə də qarətçilərin əlində, onun yerini isə yalnız Saymon bilir.

Saymonu qaçıran cinayətkarlar ondan məlumat almaq üçün işgəncəyə əl atırlar, lakin yaddaş itkisi buna mane olur. İtmiş tablonun yerini öyrənmək üçün dəstə hipnoz üzrə mütəxəssis Elizabeti işə cəlb edir. Həkim Saymonun şüuraltına daxil olaraq unudulmuş xatirələri oyatmalıdır.

«Trans» filmi Britaniya və Fransa kinematoqrafçılarının birgə işidir və 2013-cü ildə nümayiş olunub. Quruluşçu rejissor Denni Boyldur, əsas rolları Ceyms Makevoy, Vensan Kassel və Rozario Douson canlandırıb.