Şəfa

Şəhərdə bir-birinin ardınca izahı çətin olan amansız cinayətlər baş verir. Bir-biri ilə heç bir əlaqəsi olmayan insanlar eyni tərzdə qətllər törətsələr də, nəticədə etdikləri əməlləri xatırlamırlar. Bu sirli hadisələrin araşdırılması xəfiyyə Takabe və ona kömək edən psixiatr Sakumaya həvalə olunur.

Saxlanılan şübhəlilərin dindirilməsi heç bir ipucu vermir və istintaq çıxılmaz vəziyyətə düşür. Lakin polisin əlinə yaddaşını itirmiş qəribə bir gənc keçdikdən sonra hadisələrin istiqaməti dəyişir. Bu sirli şəxslə ünsiyyət quranlar qəfil öz iradələrini itirərək cinayət törətməyə başlayırlar.

Rejissor Kiyoshi Kurosawanın çəkdiyi «Cure» filmi 1997-ci ildə Yaponiyada istehsal olunub. Psixoloji triller janrında olan bu ekran əsərində baş rolları Koji Yakusho, Masato Hagiwara, Tsuyoshi Ujiki və Anna Nakagawa canlandırıblar.