Vəkil

Gənc hüquqşünas Arcun Kapur cinayətkarları məhkəmədə müdafiə edərək böyük şöhrət qazanıb. Qanunları aqressiv şəkildə öz xeyrinə yozmağı bacaran vəkil ən ağır cinayətləri törətmiş şəxsləri belə cəzadan qurtarır. Qanunsuz aləmin nümayəndələri ona böyük hörmət bəsləyir, Arcun isə uzun müddət əməllərinin mənəvi tərəfi barədə düşünmədən uğurunun dadını çıxarır.

İllər keçdikcə vicdan əzabı onu rahat buraxmır və Arcun vəkillik karyerasını bitirib həyatını dəyişmək qərarına gəlir. Lakin naməlum bir düşmən onun dinc həyata qayıtmasına imkan vermir və sabiq vəkil hədəfə çevrilir. Yaranmış təhlükədən xilas olmaq üçün o, rəfiqəsi Urvaşi və yerli polis əməkdaşı Yaş Deşmukhdan kömək istəməli olur.

2009-cu ildə Hindistanda çəkilmiş «Vəkil» (Fox) filmi triller, dram və cinayət janrlarını özündə birləşdirir. Ekran əsərinin rejissoru Dipak Ticoridir, baş rolları isə Arcun Rampal, Sanni Deol, Udita Qosvami və Saqarika Qhatqe canlandırıb.