Şübhə altında

Puerto-Rikonun paytaxtında bayram ab-havası hökm sürdüyü vaxtda nüfuzlu vəkil Henri Hörst xeyriyyə tədbirinə tələsir. Lakin o, getməzdən əvvəl parkda aşkar etdiyi meyitlə bağlı polis müfəttişi Viktor Benezeyə ifadə verməlidir. Qısa söhbət kimi başlayan bu görüş tezliklə istiqamətini dəyişir.

İstintaq otağındakı dindirilmə iki təcrübəli şəxsin intellektual qarşıdurmasına çevrilir. Dedektiv qoca milyonçunu kasıb məhəllələrdən olan azyaşlı qızların zorlanmasında və qətlində günahlandırır. Dəlillər vəkili küncə sıxsa da, müstəntiq həqiqəti tam üzə çıxarmaq üçün şübhəlinin gizli tərəflərini araşdırmağa məcbur qalır.

ABŞ və Fransanın birgə istehsalı olan «Şübhə altında» adlı kriminal filmi rejissor Stiven Hopkins 1999-cu ildə lentə alıb. Əsas obrazları Cin Hekmen, Morqan Friman, Tomas Ceyn və Monika Belluççi canlandırıblar.