Təsəlli

Federal Təhqiqat Bürosunun əməkdaşları çıxılmaz vəziyyətə düşdükdə yenidən Con Klensinin qeyri-adi bacarığına ehtiyac duyurlar. Keçmişdə baş verənləri və qismən gələcəyi görmək qabiliyyətinə malik olan bu mütəxəssis əvvəllər dəfələrlə çətin işlərin açılmasına kömək edib. Lakin bu dəfə o, karyerasının ən təhlükəli cinayətkarı ilə üz-üzə qalır.

Şəhərdə silsilə qətllər törədən soyuqqanlı qatil heç kimə bənzəmir. Məlum olur ki, həmin şəxs də gələcəkdə nələrin baş verəcəyini əvvəlcədən duyur və hər zaman təqibçilərindən bir addım qabaqda gedir. Con qurbanların sayının artmasının qarşısını almaq üçün bu hiyləgər rəqibə qarşı ağıl savaşına başlayır.

ABŞ istehsalı olan «Təsəlli» (Solace) filmi 2014-cü ildə rejissor Afonso Poyart tərəfindən çəkilib. Kriminal trillerin əsas obrazlarını Entoni Hopkins, Kolin Farrell, Ceffri Din Morqan və Ebbi Korniş canlandırıb.