Pelikan İşi

ABŞ Ali Məhkəməsinin iki üzvünün qətlə yetirilməsindən sonra hüquq fakültəsinin tələbəsi Darbi Şou bu işi araşdırmağa başlayır. Arxivləri araşdıran gənc qadın cinayətin arxasında kimin dayana biləcəyinə dair öz fərziyyəsini hazırlayır və xüsusi bir hesabat tərtib edir. Onun müəllimi və sevgilisi həmin sənədləri FTB məsləhətçisi olan tanışına ötürür, bundan sonra isə avtomobilində törədilən partlayış nəticəsində həyatını itirir.

Təhlükə altında qalan və təqib edilən Darbi nüfuzlu qəzetin jurnalisti Qrey Qrantemlə əlaqə quraraq topladığı məlumatları ona danışır. Birlikdə araşdırma apararkən qətllərin arxasında neft maraqları və böyük korrupsiyanın dayandığını, izlərin isə birbaşa Ağ Evə qədər uzandığını aşkara çıxarırlar.

1993-cü il istehsalı olan "The Pelican Brief" filmi ABŞ-da rejissor Alan C. Pakula tərəfindən çəkilib. Ekran əsərində əsas obrazları Culiya Roberts, Denzel Vaşinqton, Sem Şepard və Con Hörd canlandırıblar.