Qurd saatı

Rəssam Yohan Borq həyat yoldaşı Alma ilə birlikdə ucqar bir adada yerləşən kiçik evə köçür. Yohan vaxtını rəsm çəkməklə keçirir, xanımı isə məişət işləri ilə məşğul olur. Onların səssizliklə dolu sakit və monoton günləri hər iki tərəfi tam qane edir.

Lakin adada yaşayan yeganə sakinlər onlar deyil. Ərazidə məskunlaşmış qəribə aristokratlar Yohanın yaradıcılığına böyük maraq göstərir və günlərin birində bu ər-arvadı öz məclislərinə qonaq çağırırlar.

«Vargtimmen» adlı qorxu və dram filmini 1968-ci ildə isveçli rejissor İnqmar Berqman çəkib. Əsas rollarda Erland Yuzefson, Liv Ulman, İnqrid Tulin və Aqda Helin çəkiliblər. Ekran əsəri rejissorun «Forö trilogiyası»nın bir hissəsidir.