Cinayətkarlar ittifaqı

Ali kommersiya məktəbinin məzun görüşündən sonra uğurlu karyera qurmuş üç dost daima bəxti gətirməyən dördüncü yoldaşlarına zarafat etmək qərarına gəlirlər. Onlar videokasetdə saxta tiraj videosu hazırlayaraq onun lotereya biletinə böyük uduş çıxdığını göstərirlər. Zarafata ürəkdən inanan kədərli qəhrəman isə torpaq alıb əyləncə parkı tikmək üçün anasının dükanını girov qoyur.

Heç bir pulun olmadığını başa düşən Daniel düşdüyü ağır vəziyyətdən qurtulmaq üçün kömək axtarmağa başlayır. O, həmin məktəbi bitirmiş digər bir tanışına, Bernar Asslerə müraciət edir. Lakin bu iş adamı sadəlövh sahibkarı aldatmaq üçün öz planlarını qurur.

1987-ci ildə Fransada istehsal olunmuş «Cinayətkarlar ittifaqı» komediya və detektiv filminin rejissoru Klod Zididir. Ekran əsərində baş rolları Fransua Klüze, Kristof Malavua, Jan-Pyer Bisson və Kler Nebu canlandırıblar.