#SalveRosa

On üç yaşlı Roza sosial şəbəkələrdə böyük şöhrət qazanmış gənc inflyuenserdir. Kameraların arxasında isə onun həyatı heç də kənardan göründüyü kimi parlaq deyil, çünki anası qızının hər bir addımını ciddi nəzarətdə saxlayır. Məktəbdə huşunu itirməsi ilə nəticələnən gözlənilməz hadisədən sonra Roza öz keçmişini araşdırmağa qərar verir.

Araşdırma dərinləşdikcə yeniyetmə anlayır ki, onun yaratdığı mükəmməl obraz və qazandığı uğur manipulyasiyalar və yalanlar üzərində qurulub. Həqiqəti üzə çıxarmaq cəhdləri isə təkcə anası ilə münasibətləri gərginləşdirmir, həm də Rozanın şəxsi təhlükəsizliyini təhdid altına salır.

Braziliya istehsalı olan «#SalveRosa» detektiv trilleri 2025-ci ildə işıq üzü görüb. Rejissor kürsüsündə Suzanna Lira əyləşib, əsas obrazları isə Klara Kastano, Karini Telis, İndira Nasimento və Alana Kabral canlandırıb.