Çuxur

On iki yaşlı Ceymi Bencamin hər kəsin məsxərə hədəfinə çevrilib: həmyaşıdları, qonşular və hətta məktəb müəllimi də onunla lağ edir. Uşağın qəribə vərdişləri var. O, onunla danışan oyuncaq ayısı ilə vaxt keçirir, yersiz zarafatlar edir və dayəsinin arxasınca gizlicə güdür.

Bir gün yaxınlıqdakı meşəlikdə gəzərkən Ceymi içində troq adlandırdığı dörd qəribə məxluqun gizləndiyi bir çuxur aşkar edir. Onlarla telepatik əlaqə quran oğlan varlıqların doymayan aclıqdan əziyyət çəkdiyini öyrənir. Əvvəlcə valideynlərindən oğurladığı pullarla qəssabdan ət alan Ceymi, sonradan tanışlarını aldadaraq çuxurun yanına gətirir və onları qaniçən məxluqlara yem edir.

Kanada istehsalı olan «The Pit» qorxu və detektiv filmi rejissor Lyu Leman tərəfindən çəkilib. Ekran əsəri 1981-ci ildə işıq üzü görüb. Əsas rolları Laura Hollinqsvort, Con Oten, Pol Qrişam və Vendi Şmidt canlandırıblar.