Əjdaha nişanəsi

Silahlı basqınçılar dinc bir ailənin evinə soxularaq valideynləri qətlə yetirir və onların balaca qızını qaçırırlar. Əsir düşən uşağın bədəninə qədim Şərqdə kənizlərə vurulan sirli işarə damğalanır. Əski inanclara görə, bu cür qadınlar kişiləri ən ehtiraslı anında öldürərək onların ruhlarını günahlardan azad etməli və başqa aləmə göndərməli idilər.

İllər sonra şəhərdə qəribə və amansız qətllər zənciri başlayır. Gənc bir qadın yaxınlıq zamanı sevgililərinin boğazını kəsir və cinayət yerində qanla əjdaha simvolu çəkir. Müstəntiqlər və polis psixoloqu Deyvid Stretton bu qorxunc cinayətlərin izinə düşürlər.

«Snapdragon» triller filmi 1993-cü ildə rejissor Uort Kiter tərəfindən ABŞ-da lentə alınıb. Baş rolları Diana Li Hsü, Fillip Troy Lincer, Tom Bosko və Rokvud canlandırıblar.