İblisin balı

Gənc musiqiçinin sevgilisi qarşısında motosikletlə etdiyi təhlükəli hərəkətlər ağır qəza ilə nəticələnir. Ağır xəsarət alan oğlanı təcili əməliyyata aparırlar, lakin onun həyatını xilas etmək mümkün olmur. Həyat yoldaşı ilə mübahisə etdiyi üçün əsəbləri gərgin olan cərrah diqqətsizlik göstərir və əli əsərək xəstənin əməliyyat masasında ölümünə səbəb olur.

Sevgilisini itirməyin kədərinə dözə bilməyən qız həkimdən intiqam almağa qərar verir. O, cərrahı oğurlayaraq vəfat etmiş sevgilisinin evinə aparır və orada zəncirləyir. Təqsirkar saydığı həkim artıq tamamilə intiqam hissi ilə yaşayan çarəsiz qadının əlində əsir qalır.

«İblisin balı» (Il miele del diavolo) trilleri 1986-cı ildə İtaliya və İspaniyanın birgə istehsalı ilə çəkilib. Filmin rejissoru olan Lucio Fulci həm də rollardan birini ifa edib, digər əsas obrazları isə Corinne Cléry, Stefano Madia və Paula Molina canlandırıblar.