Hörümçək yuvası

Gənc amerikalı tədqiqatçı Alan Uitmor həmkarı professor Rot ilə görüşmək məqsədilə Budapeştə səfər edir. Macarıstan paytaxtında baş tutan qısa görüş zamanı professor ona olduqca mühüm məlumatların toplandığı qara rəngli bir kitab təqdim edir. Həmkarının bu sirli davranışı gənc alimi dərhal təşvişə salır.

Alan baş verənləri tam anlamaq üçün professorla yenidən təmas qurmağa çalışsa da, artıq gec olur və yaşlı alim qətlə yetirilir. Əlindəki müəmmalı kitabla yad şəhərdə tək qalan Uitmor geri çəkilmir və baş vermiş cinayəti öz gücü ilə araşdırmağa qərar verir.

Triller, detektiv və qorxu janrlarını birləşdirən «Il nido del ragno» («Hörümçək yuvası») filmi 1988-ci ildə İtaliyada istehsal olunub. Ekran əsərinin rejissoru Canfranko Canyi, baş rol ifaçıları isə Roland Vaybenqa, Bill Bolender, Attila Löte və Laslo Sayposdur.