İki Ceyk

Hadisələr 1948-ci ildə Los-Ancelesdə cərəyan edir. Şəxsi xəfiyyə Ceyk Qittes torpaq alveri ilə məşğul olan adaşı Ceyk Bermanın sifarişini qəbul edir. Berman həyat yoldaşının ona xəyanət etdiyindən şübhələnir və xəfiyyədən hər şeyi araşdırmağı xahiş edir. Qittes təkcə faktları toplamaqla kifayətlənmir, həm də müştəriyə arvadını sevgilisi ilə görüşərkən yaxalamağı təklif edir.

Qurulan pusqu qanlı sonluqla bitir: qəzəblənən Berman arvadının sevgilisini qətlə yetirir. Qətlə yetirilən şəxsin Bermanın biznes şəriki olduğu üzə çıxanda məsələ daha da mürəkkəbləşir, çünki şərikinin ölümündən sonra bütün sərvət ona qalır. İndi Qittes bu cinayətin anidən baş verdiyini və ya qabaqcadan planlaşdırılmış tamah məqsədli qətl olduğunu aydınlaşdırmalıdır.

1990-cı ildə ABŞ-da lentə alınan «İki Ceyk» filminin rejissoru Cek Nikolsondur. Kriminal dram janrında olan layihədə Meq Tilli, Syu Karlton, Cessika Z. Daymond və Van Dayk Parks çəkiliblər.