Qış tətili

Qarlı dağlarda yerləşən qış düşərgəsinə yollanmaq məktəblilərin çoxu üçün ailədən uzaqda həmyaşıdları ilə vaxt keçirmək imkanı yaradır. Lakin baş qəhrəman üçün bu səfər heç də sevincli anlarla başlamır. Səhhətindəki nasazlıqlar və ailədəki problemlər uşağın narahatlığını artırır.

Atasının söylədiyi qorxunc əhvalatlar isə vəziyyəti daha da gərginləşdirir. O, oğluna orqan alveri ilə məşğul olan cərrahlardan və uşaq ovlayan canilərdən bəhs edərək uşağın təxəyyülünü qorxularla doldurur. Nəticədə dincəlməli olduğu düşərgə həyatı tədricən narahatlıq və qaranlıq şübhələrlə dolu günlərə çevrilir.

«Qış tətili» (La classe de neige) adlı Fransa istehsalı olan dram və detektiv filmi rejissor Klod Miller tərəfindən çəkilib. 1998-ci ildə nümayiş olunan ekran əsərinin əsas rollarında Valeri Bettenkurt, İv Jak, Şantal Banlye və Tina Sportolaro çəkiliblər.