Dördüncü kişi

Alkoqol asılılığı olan məşhur yazıçı Gerard Reve yeni əsərini təqdim etmək üçün Vlissingen şəhərindəki ədəbiyyat klubuna yollanır. Qatar səfəri zamanı onun gözünə gələcək bədbəxtlikdən xəbər verən qəribə görüntülər gəlir, vaqondakı naməlum qadın isə onda daxili narahatlıq yaradır. Çıxışdan sonra Amsterdam qatarına gecikən yazıçı gecəni qorxulu oteldə keçirməmək üçün tədbirdə tanış olduğu varlı dul qadın Kristin Halslaqın evində qalmağa razılaşır.

Qonaq olduğu məkanda Gerardın qarabasmaları səngimək əvəzinə daha da güclənir və tez-tez təkrarlanır. Əsrarəngiz görüntülər onu birbaşa ev sahibəsindən gələn təhlükə barədə xəbərdar edir.

1983-cü il istehsalı olan «De vierde man» filmini niderlandlı rejissor Pol Verhoven ekranlaşdırıb. Əsas rollarda Rene Sautendeyk, Reynu Bussemaker, Hans Verman və Dolf de Vris çəkiliblər.