Cinlər

Səudiyyə Ərəbistanının səhralarında qəzaya uğrayan hərbi təyyarəni tapmaq üçün xarici legion əsgərlərindən ibarət dəstə göndərilir. Hadisə yerinə çatan hərbçilər həlak olan zabitlərdən birinin qoluna qandallanmış sirli çanta aşkar edirlər. Dəstə tapıntını götürərək geri qayıtmağa çalışsa da, qəfil başlayan qum fırtınası planları pozur.

Təbii fəlakətdən qorunmağa çalışan əsgərlər xəritələrdə olmayan qəribə bir kəndə sığınırlar. Çox keçmədən burada reallıq hissini itirən heyət müəmmalı və qorxulu hadisələrlə üz-üzə qalır. «Djinns» filmi mistika və sirli atmosferi bir araya gətirir.

Ekran əsərinin quruluşçu rejissorları Hyu Martin və Sandra Martindir. Fransa və Mərakeşin birgə istehsalı olan bu film 2009-cu ildə işıq üzü görüb. Əsas rollarda Qreqori Kidel, Kərim Saidi, Frank Merkadaly və Jan-Fransua Oqyust çəkiliblər.