Oldboy

1988-ci ildə sadə iş adamı Oh Dae-su qızının üç yaşının tamam olduğu gün evə gedərkən sərxoş olur və intizamsızlığına görə polis bölməsinə düşür. Uşaqlıq dostu zamin duraraq onu idarədən çıxarır. Yoldaşının onun arvadına zəng etdiyi qısa zaman kəsiyində Oh Dae-su yoxa çıxır. Naməlum şəxslər onu qaçırır və pəncərəsiz qapalı bir otaqda on beş il saxlayırlar.

Əsirliyi qəfil bitən baş qəhrəman azadlığa buraxıldıqdan sonra illərini oğurlayan düşmənlərin kimliyini və törədilən cinayətin arxasındakı səbəbləri axtarmağa başlayır. Başına gələnlərin hesabını sormaq və bu sirri açmaq üçün onun cəmi bir neçə günü var.

«Oldboy» filminin rejissoru Pak Çhan-ukdur. Cənubi Koreya istehsalı olan bu detektiv trillerdə əsas rolları Çhve Min-şik, Yu Ci-the, Kan He-con və Kim Byon-ok canlandırıb. Əsər 2003-cü ildə ekranlara çıxıb və BBC-nin XXI əsrin ən möhtəşəm 100 filmi siyahısına daxil edilib.