Kollini İşi

2001-ci ildə Berlində səs-küylü bir cinayət baş verir: ahıl italyan Fabritsio Kollini tanınmış sahibkar Hans Mayeri qətlə yetirərək polisə təslim olur. İttiham olunan şəxsin müdafiəsi gənc vəkil Kaspar Laynenə həvalə edilir. Bu proses vəkil üçün həm də ağır mənəvi sınağa çevrilir, çünki qurban vaxtilə ona atalıq edib, iş adamının nəvəsi Yohanna isə Kasparın gənclik sevgisi olub.

Kollini cinayətin səbəbləri barədə susur, qarşı tərəfdə isə son dərəcə təcrübəli prokuror dayanır. Təsadüfi bir ipucu tapan gənc hüquqşünas öz araşdırmasına başlayır və hadisənin köklərini öyrənməyə çalışır. Bu axtarışlar onu keçmişin gizli və qaranlıq səhifələrinə aparıb çıxarır.

2019-cu il istehsalı olan «Kollini İşi» filminin rejissoru Marko Kroytspayntnerdir. Almaniya istehsalı olan bu dramatik trillerdə baş rolları Elias M'Barek, Aleksandra Mariya Lara, Franko Nero və Hayner Lauterbax canlandırıblar.